(15)
قصة " ماليش غيركـ " ..
-----------------------------
بعد ما الدنيا كلها اتسدت فـ وش لينا .. ملقتش حل غير انها تدخل باباها ومامتها في الموضوع
لكن كان في دايما حاجه بتمنعها من انها تقولهم .. لكن في الآخر .. لما إلياس عرف البنات اللي في الحفله اللي اتكفل بيها انه بيعشق لينا .. قررت انها تقول لباباها بدال ما يعرف من حد غريب
--
لينا : انا بتبهدل يا بابا .. بقالي اكتر من شهر مش بنام .. انا مش قادره استحمل اي حاجه بتحصلي انا معرفش انا أذيت مين في حياتي عشان يحصلي كل دا !!
الحاج عمرو : اسألك دلوقتي مالك ولا لأ ؟؟
لينا بصوت عياط عالي : آآآآه آآآآآآآه
( ام لينا كانت بتصلي صلاة العشاء .. وسمعت لينا وهيا بتعيط وبتكلم باباها .. فسرعت في الصلاه وقامت بسرعه تشوف بنتها الوحيده منهاره كدا ليه !! )
ام لينا بخضه : لا حول ولا قوة ايه بالله .. في ايه ياحبيبتي .. مالها ياعمرو
الحاج عمرو بص لـ ام لينا نظرة .. معناها تعالي اقعدي واسكتي
لينا : ماما انا واقعه في مصايب كتيره .. وماليش غيركو تحلولي مصايبي مبقتش قادره افكر في حاجه وخايفه اعمل اي حاجه تزيد الطين بلّة ..
ام لينا : في ايه ياحبيبتي .. حد عملك حاجه في الحفله ؟؟ في ولد ضايقك
( لينا فضلت تعيط ومكنتش عارفه تبتدي منين الكلام وكل ماتيجي تقول حاجه تعيط اكتر .. وام لينا قلقت عليها كـ بنت ومصممه تعرف حصلها ايه )
ام لينا : طب اوديكو دكتور ؟
لينا بـ شحتفة : لـ لـ لأ .. انا كويسه
ام لينا اتنرفزت : كويسة ايه !!!! ماتقولي ايه اللي حصل حد لمسك ؟
لينا بعياط : الموضوع مش كدا ياماما
ام لينا بعصبيه : اومال في اييييييييييييه
( لينا سابت حضن ابوها ومشيت بسرعه دخلت اوضتها وقفلت الباب )
ام لينا : انت هتسيب بنتك كدا وتفضل ساكت ياعمرو ؟؟؟ مش لازم نعرف فيها ايه وايه المصايب اللي بتقول عليها دي
الحاج عمرو بكل برود : سيبيها اما تهدى هتيجي تحكيلك
ام لينا : تحكيلي ؟ يعني انت عارف فيها ايه
الحاج عمرو : اه
ام لينا بعصبيه : طب ماتقول
الحاج عمرو بزعيق : اتفصلت من الجامعه عشان اتخانقو عليها اتنين .. ارتحتي دلوقتي ؟؟؟ سيبيها بقى في حالها
ام لينا : اتخانقو عليها اتنين ؟؟؟؟ ليه هوا انا بنتي ايه ؟؟ دي بتمشي جمب الحيط ... دي ملهاش كلام مع ولاد يبقو يتخانقو عليها ليه ... وتنفصل هيا ليه
الحاج عمرو : الله يرضى عليكي سيبيني وسيبيها دلوقتي .. هيا اما تهدى هتيجي تقول التفاصيل .. اديكي شفتي عصبيتك عليها خلتها تعمل ايه
ام لينا : انت ابوها .. المفروض انت اللي تتنرفز عليها وانت اللي تعرف التفاصيل منها .. لقيتك بتطبطب وبتدادي قلت ازعق انا
( الحاج عمرو قام من سكوت ودخل يتوضى ويصلي العشاء .. وام لينا هتجنن وعاوزه تعرف ايه اللي حصل بس عارفه ان بنتها مش هتقولها حاجه طول ماهيا عصبيه .. فـ راحت تصلي العشاء تاني عشان السرعه اللي خلصت بيها الصلاه )
--
فـ بيت نوران :
نوران : انت ايه اللي انت عملته دا ... انت فضحت لينا .. انت عرفت بنات الجامعه كلها انك بتحبها
إلياس : طب وايه اللي فيها ؟؟
نوران : ان باينلك ناسي انك في مصر .. مش في لندن .. انت كدا هتخلي البنات كلها يتكلمو عليها
إلياس : طب ماكدا كدا البنات طول عمرهم بيتكلمو ايه الجديد يعني واما يزهقو من الكلام عليها هيسكتو
نوران : لا مش هيسكتو .. كل واحده هتروح تقول لشلتها سواء صبيان او بنات .. وكدا لينا اتهرست في الرجلين وانت السبب
إلياس : يعني انا غلطان اني كنت بعتذر وبعبرلها عن حبي ؟؟
نوران : انت مش بس فضحت لينا .. انت كمان فضحتني
إلياس بعصبيه : انا جيت جمبك ؟؟؟؟؟؟؟؟؟؟
نوران : انت مش فاكر انت قلت ايه .. اما اروح الجامعه الكل هيقول ان عندي اخ عنده حاله نفسيه .. انت بقيت كابوس في حياتي .. ايه اللي رجعك يا اخي ايه اللي رجعك !!
( نوران لاول مره تحس بقهرة لينا وكرهها لـ إلياس أخوها وكرهها لتصرفاته .. وبدون اي تفكير .. خدت شنطتها ونزلت الدور الأول في الفيلا ..)
نوران : انتي صليتي العشاء ياعمتي؟
طنط نجاه : اه يا حبيبتي صلتها .. انتي رايحه على فين
نوران : انا هخرج انا وإلياس تاني .. هوا قالي اسخنله العربيه
طنط نجاه : ماشي ياحبيبتي متتأخروش بس
نوران : حاضر ياعمتي ( وباست عمتها فـ راسها وخرجت من الفيلا )
( نوران جه في دماغها انها تسيب لإلياس البيت عشان يبقى خسران لينا واخته كمان ... وكانت حاطه في دماغها انها هتروح لـ بيت لينا تقعد معاها )
-
فـ بيت طنط فاطمه :
منى : اسكت يانبيل عللي حصل في الحفله النهارده
نبيل بابتسامه بسيطه : ايه اللي حصل؟
منى : إلياس راح الحفله و ......
نبيل قاطعها بعصبيه : الحيوان دا كان هناك بيعمل ايه .. مش كانت حفله للبنات بس ؟؟؟؟؟؟؟
منى : لا اله الا الله .. انت هتسمع اللي حصل ولا اروح اوضتي
نبيل : مش عاوز اسمع اي زفت .. سيبيني لوحدي
منى : انت حر .. انا قايمه تصبح على خير
( نبيل قام من على سريره لبس العباية الشتوي فوق هدوم البيت ونزل ركب عربيته وراح للبحر وفضل قاعد ف العربيه مخنوق ومتضايق من الكابوس اللي دخل حياته ولأول مره يفكر انه هوا كمان يقتله ويريح الكل من شره .. فمسك موبايله واتصل على إلياس )
إلياس : نعم ؟؟
نبيل : الناس بتقول السلام عليكم
إلياس : وعليكم السلام يا سيدي في حاجه ؟
نبيل : انا عاوز اشوفك .. انا وصلت لحل
إلياس : انا مش هسيب لينا وجوازتكو مش هتتم
نبيل : انا مش هتجوزها .. انا خلاص مبقتش عاوزها
إلياس : ايه ؟ بجد ؟
نبيل : اه عشان كدا كنت عاوز اقابلك ونتفق على حاجه نقولها لـ لينا
إلياس : ممممممم طب انا قاعد في فندق تجيلي ؟؟
نبيل : خلاص تمام .. بكرا هبقى عندك .. الساعه كام ؟؟
إلياس : ممممممم الساعه 8 كدا
نبيل : خلاص تمام .. مش هتأخر سلام ..
( إلياس كان عارف ومتأكد ان نبيل عاوز يشوفه عشان يأذيه وخصوصا انه كان متأكد ان اخته هتروّح من الحفله وتحكيله كل حاجه .. وكان عارف ان مستحيل نبيل يستغنى عن لينا مهما حصل .. وكان بيفكر لـ نبيل فيمصيبه بقاله فتره .. وملقاش انسب من الفرصه دي عشان ينفذها )
إلياس : نوراااااااااااااان نوران ؟؟؟
طنط نجاه : نوران سبقتك من بدري ع العربيه ياحبيبي
إلياس : سبقتني ازاي يعني
طنط نجاه : هيا قالتلي انكو خارجين وكانت رايحه هيا تسخن العربيه
إلياس بعصبيه : انتي ازاي تسيبيها تخرج من البيت ؟؟؟؟ عربيه ايه اللي تسخنها احنا لسه راجعين من الحفله :@
طنط نجاه بصوت عالي : وللللللد انت اتجننت بتعلي صوتك عليا ؟؟
إلياس بقرف : يوووووهووووووووه انا سايبلك البيت وماشي اشبعي بيه
طنط نجاه : ولد بلاش قلة أدب
إلياس : ( شاور بإيده بحركه معناها انه متجاهل كلامها )
( إلياس كان عارف ومتأكد ان نوران عند لينا .. لان ملهاش حد غيرها تروحله البيت وتبات عندها .. فـ طلع نوران من دماغه واتفرغ فـ المصيبه اللي هيعملها لـ نبيل )
--
فـ بيت لينا :
ام لينا : اهلا يابنتي جيتي في وقتك
نوران بحزن : ازيك يا طنط
ام لينا : الحمدلله ياحبيبتي مال وشك انتي كمان ؟؟؟ انتي تعرفي حاجه عن اللي حصل لـ لينا ؟؟
نوران : انا السبب في كل حاجه حصلتلها
ام لينا : طب خشي اتفضلي مش هنتكلم ع الباب
-
ام لينا : ها ياحبيبتي احكيلي في ايه
نوران : الحكايه طويله اوي ياطنط .. هيا لينا فين
ام لينا بنرفزه : هوا انا كل ما اسأل حد يقولي الحكايه طويله ويمشي .. في ايه مش هتطلعي لـ لينا الا اما تحكيلي
نوران ابتدت تعيط : بالله عليكي ياطنط ماتضغطي عليا .. بعد اذنك انا هروح لأوضة لينا
ام لينا : طيب هترجعي وتحكيلي ؟؟؟
نوران : متقلقيش ياطنط .. انا ماليش حته اروحها .. لو بعد اذن عمو ممكن أبيت هنا النهارده ؟
ام لينا : ايه دا تبيتي ؟ مش مشكله ياحبيبتي .. بس عمتو عارفه ؟
نوران : اه ياطنط عارفه ... انا بس متشاكله مع إلياس اخويا ومش قادره اقعد انا وهوا في بيت واحد
ام لينا : ربنا يهدي النفوس ياحبيبتي ... بس انتي وعدتيني هتحكيلي
نوران : حاضر ياطنط
--
( نوران خبطت على اوضة لينا ودخلت .... ولينا كانت مغطيه وشها بالبطانيه .. جت نوران قعدت على السرير جمب لينا )
نوران : انا عارفه اني آخر خِلـقة عاوزه تشوفيها فـ الدنيا دي
( لينا شالت البطانيه من على راسها بسرعه متفاجأه بـ بنوران وهيا قاعده على سريرها بتكلمها )
نوران بتكمل بعياط : بس بعد اللي حصل النهارده .. انا اخويا مات بالنسبالي .. انا سبتله البيت وملقتش حته تانيه اروحها غير بيتك
( لينا رجعت غطت وشها بالبطانيه متجاهله كلام نوران )
نوران بتكمل : فاكره زمان واحنا صغيرين اما كانت عمتي بتسمحلي أبيت عندك كل يوم خميس وكنا بننزل ننام تحت السرير ونولع شمعه كأننا في خيمه
لينا من تحت البطانيه : كنا بناخد المخدات بتاعت الصالون ونحطها جمب السرير كأننا في حرب وبنتحامى فيهم
نوران : انا كنت عارفه ان عمرك ما هتشيلي مني حتى لو اتسببتلك في مشاكل كتير
لينا من تحت البطانيه : لو عايزاني اسامحك .. انزلي قولي لبابا وماما كل اللي بيحصلي .. انا مش عارفه اقول حاجه (ابتدت تعيط ) كل ما اجي احكي حاجه لساني يقف وافضل اعيط
نوران : هنحكيلهم احنا الاتنين .. وهكون جمبك وهستحمل اي عقاب او اهانه منهم
لينا : خلاص خليها بكرا عشان انا مش قادره اقف على رجلي وهنام ..
نوران : طب وانا هتنيميني فين
لينا برفعة حاجب : في مكان تحت السرير انزلي نامي فيه
نوران بتهزر مع لينا: بقى كدا ؟؟؟؟؟؟؟؟؟؟؟؟؟؟ طب اهووووووو
( نوران زقت لينا على جمب ونامت جمبها وفضلو يتخانقو على المخده والبطانيه .. ودي تشد من دي .. ودي تزق دي لحد ماتعبو ونامو )
--
اليوم الثاني الساعه 12 الظهر :
إلياس : ايوا يانبيل انت فين دلوقتي
نبيل : انا في البيت ليه؟
إلياس : تعرف تجيلي ؟
نبيل : دلوقتي ؟؟
إلياس : اه اصل انا هبقى مشغول بالليل .. انت عارف بقى الولد مننا اما بيقعد في فندق بيعمل ايه
نبيل بضحكه صفرا : هههههه اه ماشيه معاك
إلياس : تعال ياصاحبي وانا اروقك
نبيل : لا تسلم انا هقوم البس اهه مسافة السكه
إلياس: ماشي مستنيك
--
فـ بيت لينا :
( الباب خبط .. ونوران ولينا كانو بيتفرجو عالتلفزيون .. وام لينا في المطبخ بتاكل في نفسها من الفضول والخوف اللي في قلبها على لينا .. والحاج عمرو فـ الشغل )
لينا : ماتقومي تفتحي
نوران : مش دا بيتكو ماتفتحي انتي
لينا : افتحي يا رخمه يلااا الباب بيرن من بدري
نوران : ذلي في امي بقى عشان بيت عندك امبارح
لينا بطلعة لسان : امشي امشي افتحي
( نوران فتحت الباب ولقت إلياس في وشها .. واتخضت )
إلياس : ماتخافيش انا مش هعملك حاجه انا جاي اتكلم معاكي بهدوء
( لينا بصت على الباب من مكانها لقت إلياس ... وراحت جريت على الباب عشان تقف مع نوران )
إلياس : ازيك يا لينا ..
لينا : انت بتعمل ايه هنا متعتبش عتبة بيتنا هنا تاني
إلياس : انا مش عارف انتي كارهاني ليه .. على الاقل انا عيوبي كلها قدامك اهه .. الرك عللي مفهمك انه مخلص وعمره ماكلم بنت .. وهوا دلوقتي في فندق بيخونك مع بنات كباريه .. هوا بس واهمك انه بيحبك عشان عمرك مادتيله حاجه هوا عاوزها .. غرضه انه يتملكك بس .. اما انا بحبك من قلبي
لينا متنحه : انت كداب .. نبيل عمره مايخوني
إلياس : اذا انا لسه شايفه حالا داخل فندق ومعاه بنتين ... تحبي تيجي انتي وهيا معايا وتشوفي بنفسك ؟؟؟؟
نوران : لأ لينا لأ مش هنروح في حته
لينا بتكلم إلياس : استنانا في العربيه انت
--
لينا : ماما انا هروح انا ونوران نجيب شوية حلوات من السوبر ماركت
ام لينا بتكشيرة : انا ربع ساعه وهخلص الاكل
لينا : ماما مش انتي عاوزه تعرفي مالنا ؟؟ بالله عليكي بقى ياماما فكي التكشيره دي انا مش مستحمله تعاملك الناشف دا
ام لينا بنرفزه : ماشي يا لينا .. روحو ومتتأخروش .. سيبيني اكمل الاكل بقى
--
الإثنين أغسطس 19, 2013 3:25 pm
