(3)
قصة " ماليش غيركـ " ..
-----------------------------
نبيل ماشي هوا ومحمد بخطوات بطيئه .. وبيحاول يعمل صوت عشان لينا متتفاجئش بيه وتحصل ردة فعل مش لطيفه.. ولينا خدت بالها من الاصوات اللي بيعملها نبيل .. فبصتله ..
نبيل بنبرة حب وصوت واطي : لينا ؟؟ هوا انا بحلم ولا متخيلك فـ المول ؟؟
لينا بإحراج : ازيك يا نبيل شفت الصدفه ؟؟ انت عامل ايه يا ابن خالتي ؟؟
نبيل في سرة : ( ابن خالتي اييييييييييييه قولي يا حبيبي ياخطيبي .. ياقلبي يا روحي ياعنيا ) ..
نبيل : هه .. انا تمام يابنت خالتي .. انتو بتعملو ايه هنا
نوران : كوووويس انك قلت بتعملو ايه .. جمعت يعني وحسستني اني واقفه ولا انت مش بتشوف الا لينا
نبيل : الله يسامحك ازاي مشوفش صاحبة لينا .. دا ليل نهار بتحكي عنك لـ منى
( اما محمد بقى .. مفتحش بؤه بـ ولا كلمه وفضل باصص على نوران .. ونوران خدت بالها واتكسفت جدا من نظراته .. لأنه اول واحد تقف معاه ويبصلها كدا وعن قريب كمان )
لينا : وانت عامل ايه يا محمد
( نبيل بص لـ لينا ببصه عصبيه عشان مش عاوزها تكلم أي ولد حتى لو كان اخوه )
محمد سرحان وفي عالم تاني
نبيل : انت يازفت مش بتكلمك ؟؟؟
محمد : هه ايه .. هوا ايه الموضوع
( ويقرب عند ودن نبيل ويسأله : هيا نوران مرتبطه ؟ .. فـ نبيل يزغده في كتفه .. ويهزله راسه بـ لأ )
لينا : انتو بتتوشوشو بتقولو ايه ؟
نبيل : مفيش دا بيقولي انه جعان .. و......
لينا قاطعته : ماشي واحنا يادوب نروح عشان منتأخرش على البيت .. مع السلامه
نبيل : ماشي طب انتو هتخرجو تاني ولا ( لينا بعدت ) ........ مع السلامه
محمد ( بيحرك ايده بـ باي باي .. ولما بعدو شوية قام قايل مع السلامه يا نوران بصوت عالي )
نوران ( التفتت وابتسمت ابتسامه خفيفه وكملت مشي مع لينا )
---
لينا بتضحك بطريقه هستيريه ..
نوران : ايه يابت بتضحكي ليه
لينا : لا ابدا .. بس افتكرت نظرات الولهان على ناس اعرفهم
نوران : ههههههههههههههههههههههههههههه عارفه انا مكنتش اعرف ان نبيل مصاحب واد بالحلاوه دي
لينا : اتلمي يا بت .. انتي هتعاكسي الواد ..وكمان ايه مصاحب دي ؟؟؟ وطبعا الحلوين مش بيصاحبو الا الحلوين
نوران : هههههههههههههههههههههههههه وبتقوليلي انا اللي بعاكس .. امشي امشي ابوكي بيرن من بدري ومستني قدام المول اهه .. تعالي نطلعله قبل ما يلمح نبيل وتبقى ليله مش معديه ....
--
في بيت فيروز :
فيروز : اووووه سويتي كويس انك جيتي تعالي هوريكي حاجات آميزينج بجد
نسمه : بجد ؟؟ ايه هيا ؟
فيروز : بصي انا بكلم واحد ع الياهو بيمووووت فيا بجد واي طلب اطلبه بينفذهولي
نسمه : وانت مصدقه انه بيحبك اكيد بيضحك عليكي زي ما بتضحكي عليه
فيروز : بقولك بيمووووووووووت فيا وكمان انا مش بكلمه ع الياهو بس .. بكلمه على الفون كمان
نسمه : هار اسوود يا فيروز بتتكلمو موبايل كمان !!! افرضي بيضحك عليكي
فيروز : ايه هار اسود دي ؟؟ خليكي استايل كدا .. ويضحك عليا ايه يا نسمه .. بقولك مش بينام االا لما يسمع صوتي .. مخلي حياتي جنه .. كل اللي نفسي فيه بيجبهولي .. وخلاص اتعودت عليه فـحياتي
نسمه : انا متأكده انه بيضحك عليكي
فيروز : دا اصلا عاوز يجي يتقدملي تخيلي .. تخيلي تتجوزي واحد عن قصة حب .. اصلا انتي لو جربتي الكلام ع الياهو هتعرفي انا بتكلم فـ ايه
نسمه : لالالالا خليني بعيد عن الموضوع دا .. انتي عاوزه نبيل اخويا يقتلني
فيروز : وهوا اصلا ايه اللي هيعرفه ؟؟؟؟ محدش هيعرف حاجه الا انا وانتي .. وصدقيني انتي اسمعي كلامي وكلمي واحد وهتشوفي حياتك هتتغير ازاي
نسمه : انا اكلم واحد معرفهوش يالهوي .. لالالالالالا ماليش فالكلام دا
فيروز : متعرفيهوش ازاي يا هبله .. دي تعتبر فترة خطوبه وبتتعرفو على بعض وهيجي يتقدملك ... وبصراحه كدا احنا لما خرجنا من المدرسه الاسبوع اللي فات كان حبيبي مستني على اول الشارع عشان يشوفني .. وكان معاه واحد صاحبه وهيموت ويكلمك .. ها قلتي ايه ؟؟
نسمه : بجد ؟؟ عاوز يكلمني ..؟؟ اعجب بيا يعني ؟؟
فيروز : اومال انا بقولك ليه خطوبة وجواز .. وتتعرفو بقى ع النت وكدا وبعدها نتقابل كلنا ف مكان عام كدا ونخرج ونعيش حياتنا
نسمه : مممممممممممممم بدام خطوبه ماشي سيبيني افكر
فيروز : ماشي فكري وآدي ايميله اهوو ... وعملتلك ايميل ياهو وضفته فيه خلاص .. انتي كل اللي هتعمليه انك تفتحي من اللاب بتاعك وتدردشو سوا اوك ؟؟
نسمه : ماشي اوك ربنا يستر
--
فـ العربية ..
لينا : بابا هوا انا ممكن اطلع مع نوران شوية عشان نقيس الحاجات اللي جبناها .. الوقت لسه بدري
أبو لينا : مفيش مانع بس هما ساعتين مفيش غيرهم .. عقبال ما اخلص حاجات ف شغلي واعدي اجيبك ماشي
لينا : حلوين اوي الساعتين .. ماشي
--
فـ بيت نوران ..
لينا لبست فستان جابته عشان تشوف محتاج تعديلات لـ الحفله اللي هتعملها نوران بمناسبة رجوع اخوها ولا لأ .. طبعا قلعت الحجاب وقاست الفستان الأوف وايت .. بـ شعرها البني الطويل ..
( إلياس كان حابب يعمل لنوران مفاجأه ... فقالها انه جاي يوم الخميس .. لكن ف الحقيقه هوا كان جاي يوم الاثنيــن )
دخل إلياس البيت .. ملقاش نوران ف الصاله .. فقال اكيد فـ اوضتها
فـ دخل بسرعه لأوضة اخته .. وقال بصوت عالي : نونـــــــــااااااااا مفاجأه
طبعا إلياس لقى فـ وشة لينا بـ شعرها .. ولينا كانت واقفه قدام المرايا ومكنتش عارفه تعمل ايه غير انها تجري تقفل الباب فـ وشه و تقف ورا الباب تتصل على ابوها
إلياس : انا اسف والله كنت بدور على نوران ... هيا نوران فين ؟
لينا بصوت عياط : معرفش شوفها فـ الحمام
إلياس : هوا انتي لينا صاحبتها ؟؟
لينا مردتش
إلياس : هيا بتحكيلي عنك كتير .. كل ما بكلمها ف التلفون بتحكيلي عنك .. بس مكنتش متخيل انك كدا
لينا : ممكن تناديلي نوران .. لو سسسمحت
إلياس : حاضر حاضر هشوفها فين وهبعتهالك
--
إلياس وقف قدام باب الحمام مستني اخته تطلع .. واول ما طلعت نوران صرخت ...
نوران : الياااااااااااااااااااااااااااااااااااس ( وقعدت تعيط وتحضن فيه ) سايبني 13 سنين لوحدي اوعي تسافر تاني
إلياس : بالله عليكي ماتقلبي المواجع انا اهو جمبك ومش هسيبك تاني الا على بيت جوزك
نوران : انت عزوتي واهلي يا الياس اوعى تسيبني تاني انا مش هتجوز هقعد على قلبك وهعوض كل سنين الغربه دي
الياس : خلاص بقى يا ست امينه رزق .. ألا مين البسكوته اللي فوق دي .. لينا مش كدا ؟
نوران : تصدق نسيت انها فوق ههههههههههههههههه تعال اما اعرفك عليها
الياس : ما بلاش
نوران : ليه بس ؟
الياس : اصل حصل كذا كذا كذا
نوران : هههههههههههههههههههههههههههههههههههههه تعال بس
--
نوران : لينااااااااااا لينا افتحي
لينا فتحت الباب وكانت لبست هدومها وحجابها وطلعت تعاتب على نوران واخوها .. انه كان المفروض يخبط الباب الاول ..
وفجأه رن جرس الباب ...
إلياس فتح الباب : ايوا مين حضرتك
أبو لينا : انت اللي مين ؟؟؟
الياس : انا عايش فـ البيت دا .. حضرتك بقى اللي مين
الحاج عمرو بينادي على لينا بعصبيه وبصوت عالي .. : لينـــآآآآآآآآآآآآآ
إلياس : اهلا اهلا حضرتك اكيد والد لينا .. انا أخو نوران و......
الحاج عمرو قاطع كلامه وقاله : ششششششش ( بيسكته )
وطلعت لينا من الباب ابوها شدها جامد من ايديها ومشي بيها لحد العربيه وقالها : اركبـــــي حسابك معايا اما نروح البيت
لينا فضلت تعيط ف العربيه .. عشان باباها فهم الموضوع غلط وخايفه جدا من ردة فعله وان ثقته فيها هتقل ..
أبو لينا بزعيق : مسمعش نفـــــــــــس لحد ما نروّح :@
( لينا كتمت عياطها جواها لدرجه ان عينها برزت من كتر العياط المكتوم )
---
ياترى أبو لينا هيعمل ايه ؟؟ وهل هيفهم الموضوع ويصدقه ولا لا ؟؟
وايه رده فعل إلياس ؟؟
تابعونا ف الحلقه الجايه
الإثنين أغسطس 19, 2013 2:58 pm
