حاسب نفسك قبل منامك

تعرف اننا عايشين فى الدنيا دى فى امتحان وانك من يوم مااتولدت لحد مماتك انت لسه طالب , طب تقدر تقولى بماانك طالب وكنت طالب فى مراحل مختلفه من تعليمك
كان نفسك تجيب كام فى الثانويه العامه؟
كنت بتذاكر وبتاخد تدروس قد ايه؟
كنت خايف ومرعوب من الامتحان قد ايه؟
اتظلمت فى التصحيح؟
تفتكر ربنا هيظلمك؟
تفتكر كام مرة كنت بتراجع كل يوم على درس النهارده وتطبق عليه ؟
بجد لو فتحت باب الاسئله مش هخلص
السؤال الحقيقى انت ذاكرت لربنا؟
طب هتجيب كام؟
والا انت مش مهتم؟
الثانويه اهم؟
طب انا مش بقولك جيب 100% علشان تدخل الجنه
نخليها 70 او 80
طب اقولك نعمل ايه؟
انا مش هتكلم كانى قاعده على سجاده الصلاة ومش بقوم من عليها , او انى خلاص ماعنديش اخطاء وضامنه ال 100%
لا
انا بقولكم تعالو نفكر
ايه رايكم لو كل يوم زاكرنا اللى عملناه النهارده؟
لو قبل ماتنام كده تحاسب نفسك وتشوف عملت ايه غلطت فى ايه وايه اللى عدا من غير ماتذاكره ومين كلمته وحش ومن اتكلمت فى حقه ومين اغتبته ومين مسكين عدا عليك واتعاملت معاه بشكل سئ ومين كلمته حلو ومين اديته صدقه ومين ساعدته
وتفكر فى اخطاءك وتحسنها وتشوف الحسنات اللى عملتها وتحبها وتشوف يومك سيئاته كان اكتر ولا حسناته
اه ماتنساش
اسال نفسك صليت النهارده وكام صلاه فوتها وكام صلاه ماصلتهاش بزمه
وتبدأ من بكرة تانى يوم تصلح
ده كل واحد فينا لما كان فى الثانويه وايام التحسين كان بيعيد علشان يوصل للى نفسه فيه
ولما شالو التحسين زعلنا اوى
طب شوف رحمة ربنا بيك
سايبلك التحسين مدى حياتك
علشان باب رحمته تفضل مفتوحه فى وجهك, لما تحاسب نفسك كل يوم هتعرف انت جايب كام فى الميه
على الاقل ترتاح شويه
بدل مانبقى عايشين واحنا مش عارفين ونكتشف فى الاخر اننا ماعدناش العشرة فى الميه
انا وانتم لازم نحاسب نفسنا كل يوم
ونستغفر ربنا كل يوم
ونطلب منه الرحمه
هتعملوا كده معايا؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟